કેમ છો દોસ્તો ?
હમણાં ઘણાં સમય પછી ડાંગ વિશે વાત કરવાની તક ઊભી થઇ.
હવે વરસાદ પડી ગયો છે આ વર્ષનો. હવે વધારે પડવાની આશા અહીંના લોકોમાં નથી. જોકે જાણકારો કહે છે કે હજી નવરાત્રી પહેલા કે પછી એક રાઉન્ડ બાકી છે. એ ધોધમાર પડશે ને ડાંગમાં જે કંઇ થોડી સુસ્તી આવી છે એને પાછી હણી લેશે.
નદીઓમાં પાણી વહી રહ્યાં છે. જો કે, આરંભનો ઉછાળ થોડો ઓછો થયો છે. નદીમાં પાણીની લાલાશ પણ ઘટી છે. સ્થાનિક નિવાસીઓએ જે જગ્યા મળી ત્યાં થોડું ઘણું વાવેતર કર્યું છે એ હવે લ્હેરાવા લાગ્યું છે. ખાસ કરીને નાગલી, જુવાર અને મકાઇના પાક લહેરાઇ રહ્યાં છે. ઘાસ પણ ખાસ્સુ આકર્ષણ ઊભું કરી રહ્યું છે. જીણી જીણી અજીબ એવી જીવાંતોનો પાર નથી. રાત્રે એમનો કલશોર સાંભળવાનો એક અનેરો લ્હાવો હું આજ કાલ લઇ રહ્યો છું.
રાત્રે ચિત્કારીને બોલતાં અજાણ્યાં જ જીવડાના અવાજથી વાતાવરણ ડરામણું થઇ જાય છે. જંગલોમાંથી ઊઠતા અવનવા ને પહેલા નહીં સાંભળેલા અવાજો આ ટેકરીઓની વચ્ચે પડઘાય છે. આ પડછંદાઓ નિદ્રાધિન માણસને તો વિશેષ નથી સ્પર્શતા પણ જો એને જાગીને જાણીએ, માણીએ તો એનું એક નવું જ રુપ આપણી સામે આવે છે. એનું વર્ણન કરવું શક્ય નથી.
માનવ જીવન એવું ને એવું જ સુસ્તીસભર, અલસગતિએ ચાલી રહ્યું છે. અહીં ખાસ કંઇ બનાવો બનતા નથી અને જે બને એ અહીંના અફાટ વિસ્તારમાં ક્યાં લોપ પામે છે એનો ય ખ્યાલ આવતો નથી.
બસ મજા મજા છે.
Naresh Shukla
No comments:
Post a Comment